Demokratik Azərbaycan Uğrunda

Aslan İsmayilov                                                                                 Azərbaycan Respublikası Prezidenti İlham Əliyev Milli Təhlükəsizlik naziri Eldar Mahmudovu vəzifəsindən azad etdikdən sonra gedən proseslər məndə gələcəyə qarşı az da olsa bir ümid yaratdı. Ancaq deyəsən tələsmişəm. Bu günlərdə nümayəndəsi olduğum Zabil Salmanovla bağlı baş verənlər yenə də heç nəyin dəyişmədiyinin göstəricisidir.

Belə ki, bu ilin mart ayında Z.Salmanovu qanunsuz olaraq MTN-ə aparıb “sənin Aslan İsmayılovla salamın olduğuna görə cəzalanmalısan” deyib külli miqdarda pulunu alıb, qalan hissəsini də gətirmək şərtilə azad ediblər. Bunu bilən kimi dərhal bu əməlin quldurluq olduğunu, bu barədə rəsmi müraciət edilməsinin vacibliyini bildirsəm də sonuncu razılaşmadı. Buna baxmayaraq, mənim təkidimlə MTN-in indi həbsdə olan işçiləri ilə təmasdan yayındı. Bu ilin may ayında yenidən qanunsuz olaraq Z.Salmanov MTN-ə aparılır və ona izah edilir ki, keçən söhbətdə Aslan İsmayılovun adını həqiqəti gizlətmək üçün deyiblər. Həqiqət isə ondan ibarətdir ki, onu, artıq həbs edilmiş, Bayraq Meydanının direktoru Rəşad Məmmədovun sifarişi ilə həbs ediblər. İndi ədalətin bərpa olması üçün o, Rəşad Məmmədovun üzünə durmalı və deməlidir ki, o, öz adamları vasitəsilə zorla onun əmlakını əlindən alıb. Z.Salmanov dəfələrlə təkrar edib ki, o, R.Məmmədovu heç vaxt görməyib, onunla heç bir əlaqəsi olmayıb və onu tanımır. O, doğrudan da əmlak satıb, ancaq özünü “Azİmport” şirkətində işləyən Azər kimi təqdim edən, sonralar adının İsfəndiyar olduğu müəyyən edilən maklerə satıb və problem onunla yaşanıb. Təxminən bir gün MTN-də saxladıqdan sonra fikirləşməsi üçün buraxıblar. Səhərisi gün onu yenidən aparıb Baş İdarə rəisi generalla (bu gün həbsdə olan) görüşdürüblər. Generalın hədəsi isə konkret olub ya ifadə verəcəksən, ya da ki, məhv ediləcəksən. Bu söhbətləri bildikdən sonra təkidli tələblərimdən sonra Milli Təhlükəsizlik naziri Eldar Mahmudovla görüşüb baş verənləri ona olduğu kimi çatdırdım. Bu hadisədən xəbərsiz olduğunu bildirib qəti tədbirlər görüləcəyini vəd etdi. Həmin görüşdə mənə hər şey aydın oldu və vəziyyətimin nə qədər təhlükəli olduğunu dərk etdim. Çünki, DİN-in vəzifəli şəxslərin cinayəti barədə prokurorluğa məlumat vermiş və 2 gün sonra meyidi aşkarlanan Rəna Nəsibovanın işindən xəbərdar idim. Eldar Mahmudov vəzifəsindən azad edildikdən dərhal sonra Baş Prokuror Zakir Qaralova müraciət edib baş verənləri təfsilatı ilə bildirdik.

İki gün bundan əvvəl Z.Salmanovu Baş Prokurorluğun Ağır Cinayətlərə Dair İşlər üzrə İstintaq İdarəsinə çağırdılar. Mən də qanunu əsas götürüb nümayəndə kimi onunla getdim. 3 saata yaxın mübahisə etsəm də qanunu kobud şəkildə pozub məni prokurorluğa buraxmadılar. Müstəntiq israr etdi ki, Z.Salmanovu tək dindirmək istəyir. Mənim və nümayəndəsi olduğum şəxsin təkidinə baxmayaraq dediyindən dönmədi. Dəfələrlə idarə rəisi Eldar Əhmədova zəng etsəm də , sanki onun evində qəbuluna gəlirəm kimi məni qəbul etməkdən qəti şəkildə imtina etdi. MTN-in vəzifəli şəxsləri, cinayətləri barədə verdiyimiz şikayət araşdırılmamış qaldığı halda nümayəndəsi olduğum şəxs haqqında cinayət işi açacaqları ilə hədələyirlər. Z.Salmanovdan zor, hədə-qorxu gücünə alınmış ifadə əsasında 5 aydan artıqdır həbsdə olan 4 azyaşlı uşaq atası Rəşad Məmmədov isə həbsdə qalmaqda davam edir.

Vəkilliklə məşğul olmağımı, illər boyu getdiyim idman zalına girişimi qadağan etdilər, indi isə prokurorluğa girişimə də qadağa qoyulur. Bundan sonra da nəyə isə ümid etmək olarmı? Biz hansı cəmiyyətdə yaşayırıq? Üzümüzə gələn təhlükəni dərk edənlər varmı? Bu qanunsuzluqları edənlər gələcək məsuliyyətlərindən qorxmurlarmı? Dünən vəzifədən kənarlaşdırılan Eldar Mahmudovun atasının heykəlinin artıq bu gün uçurulmasını görən yoxdurmu?

Azərbaycan hakimiyyəti son dövrlər müharibədə ciddi uğurlar əldə edib. Ağlınıza Qarabağ müharibəsi gəlməsin. Müdafiə nazirimiz böyük uğurlardan, ermənilərin ciddi itkilərindən danışsa da o sahədə vəziyyət dəyişməyib- regionun lider dövlətinin torpaqlarının 20 faizi hələ də bölgənin autsayderi, acından olan, əhalisi kütləvi şəkildə ölkəni tərk edən Ermənistanın işğalı altındadır. Elə görünür bu uğursuzluğun kompleksini yaşadığındandır ki, hakimiyyət mütləq hansısa bir sahədə uğur qazanıb Qarabağ itkisinin acısını unutmaq istəyir. Bunun üçün inamlı qələbə lazımdır və bu qələbəni qeyd-şərtsiz təmin etmək üçün düşüncələrinə görə ən zəif obyekt seçiblər. Və bu obyekt Azərbaycan qadınıdır. Şuşanı ala bilməyənlər sərəncamlarında olan bütün vasitələrdən- MTN, DİN, Baş prokurorluq, ştatlı üzəduranlar, işverənlər, çörəyi və poqonu yataq otağı güdməkdən çıxanlardan ibarət bir ordu ilə Leyla, Xədicə yüksəkliklərinə hücuma keçdilər. Xədicə nəfəsini belə hiss etdiyi ölümün bir adddımlığından geri döndü, Leyla xanım qaraciyər serrozunun və şəkər xəstəliyinin iztirabları içində o nəfəsi hər gün, hər an duyur, ancaq şanlı hökumətimiz nə illah etdisə də, “düşməni” susdura bilmədi. Xədicə də, Leyla xanım da dəmir barmaqlıqlar arasından bir rejimə meydan oxuyacaq qədər möhkəm çıxdılar. Zəif deyib üzərinə gələnləri acınacaqlı durumda buraxacaq, bütün dünyanı üstlərinə qaldıracaq qədər güclü çıxdılar. Lakin “Azərbaycan hakimiyyəti Azərbaycan qadınına qarşı” savaşı bununla bitmədi. Son günlər hakimyyət daha bir rüsvayçılığa imza atdı. “Meydan TV” ilə əməkdaşlıq etdiyinə görə gənc və istedadlı yazar Günel Mövludun iki qardaşı nümayişkarcasına açıq bir şəkildə, eyni gündə, biri Biləsuvarda, digəri isə Sumqayıtda saxta narkotik itihamı ilə şərlənərək həbs edildi. Ağır maddi məhrumiyyətlər içində yaşayan qaçqın ailəsi iki oğlunu xilas etmək üçün hakimiyyətin tələbi qarşısında geri çəkilməyə məcbur oldu: anası və atası “Meydan TV” ilə əməkdaşlıqdan imtina etməməklə qardaşlarının həbsinə səbəb olan Günel Mövluddan imtina etdi. Elə beləcə də dedilər: “Günel “Meydan TV”-dən imtina etmirsə, biz ondan imtina edirik. Oğullarımız ona görə tutulub”. Valideynlər onlara olan təzyiqlərin, oğullarının həbsinin səbəbini, doğma qızlarından imtinanın motivini, açıq bir şəkildə etiraf edir, hakimiyyət KİV-ləri də bunu adi bir xəbər kimi, heç nə olmamış kimi yayırlar. Valideynlər deyir ki, hər iki oğlumuz kasıb, fəhlə adamlardır. Qaçqın həyatı, məhrumiyyətlər yaşadığımız üçün onlara təhsil verə bilməmişik. Onlar narkotik nə olduğunu bilmirlər. Onların cibinə narkotiki atıblar, onları şərləyib həbs ediblər, çünki Günel “Meydan TV”-dən imtina etmir. Çünki Günel haqq sözdən, həqiqətdən, vicdanından imtina etmir! Təsəvvür edirsiniz?! Bu, bir dövlətin süqutunun etirafıdır axı! Vətəndaşına ata-ana olmalı dövlətin, vətənaşının bu dünyadan köçəndə öz övladını arxayınlıqla əmanət edə biləcəyi dövlətin iflasının sübutudur axı! Bu, Azərbaycan dövlətinə, Azərbaycan hakimiyyətinə ittiham hökmüdür axı! Bu hakimiyyətdə bunu anlayacaq birisi yoxdurmu, lütfən! Belə hadisələr Stalin dövründə də olurdu. Ancaq o zaman Stalin, kommunizm sevgisi ilə zombiləşdirilmiş kütləyə bu addımları hansısa ideoloji bir səbəblə əsaslandırıraraq təqdim edirdilər. İndi isə Stalinin, Beriyanın ayaqqabısını geyinib ancaq onların yerişini yeriyə bilməyənləri heç belə əsaslandırmalar maraqlandırmır da! Onların məntiqi sadədir: “Şərləmişik, yaxşı eləmişik, tutmuşuq, əcəb eləmişik. Hakimiyyət bizimdir, nə istəyirik, onu da edirik!”. Günelin zavallı valideynlərinin halı mənə yəhudilərin məşhur Osvensim konslagerində yaşadıqlarını xatırlatdı. Orada insanları qaz kamerasına hissə-hissə aparıb məhv edirdilər. Valideylərə də “seçim” imkanı verilmişdi. Onlar əvvəl hansı övladlarını ölümə yollayacaqlarını özləri seçməli idilər. Günel xanımın valideynlərinə də belə seçim şansı verdilər, “sağ olsunlar”. Bədbəxt, biçarə ata-ana iki oğlunu xilas etmək üçün qızlarını “qaz kamerasına yolladılar”. Bu yolla, qızlarını qurban verməklə oğullarını xilas edə biləcəklərmi? Bilmirəm. Bircə onu bilirəm ki, bu yola düşmüş "dövlətçiliyi" daha heç kim və heç nə xilas edə bilməyəcək!