"Hakimiyyət bu gün elan edib ki, qarşıdan gələn parlament seçkiləri əvvəlkilərindən daha demokratik olacaq. Mən şəxsən buna inanmıram. Amma dəqiq bildiyim bir məsələ var. Dünya bazarında neftin qiymətinin enmə trendi böyük ehtimal uzunmüddətli olacaq. Bir tərəfdən indiki trend, digər tərəfdən qış ayları gəlir qarşıdan, oktyabr (dekabr) ayında İran faktoru var ki, qiymətləri daha da aşağı çəkəcək böyük ehtimal. Yəni bizim satdığımız neftən əldə etdiyimiz gəlir bir barelinə hətta 20 dollara qədər enə bilər. Aydındır ki, bu ölkə iqtisadiyyatına və ən əsası insanların-seçicilərin sosial vəziyyətinə təsir edəcək. Amma təsirləri həmən, yəni seçkilərdən əvvəl o qədər də hiss olunmaya bilər. Bir halda ki, hökumət devalvasiyanı seçkilərdən sonraya saxlamaq qərarını versə. Bu halda da 2 ay ərzində (sentyabr+oktyabr) manatın məzənnəsini indiki və ya ona yaxın vəziyyətdə saxlamaq üçün Mərkəzi Bankın rezervlərinin müəyyən bir qismini xərcləməli olacaq (ehtimal etmək olar ki, söhbət 3-4 milyard dollardan gedə bilər!). Dünya bazarındaki trendi nəzərə alsaq, belə yanaşma ilə ilin sonuna qədər Mərkəzi Bankın rezervlərindən bir şey qalmayacaq. Gələn ilin ikinci rübünə isə manat tamamilə müdafiəsiz qala bilər."
* * *
Bu gün Mərkəzi Bank bunları dedi: "Qlobal iqtisadiyyatda müşahidə olunan mürəkkəb proseslər ... iri iqtisadiyyata malik və əsas neft istehlakçıları olan bir sıra inkişaf edən ölkələrdə iqtisadi artımın zəifləməsi ... neftin qiymətinin 2014-cü ilin iyun ayından bəri 3 dəfədən çox aşağı düşməsinə gətirib çıxarmışdır."
Siz bu bəyanatda "dünyada iqtisadi böhran var" sözlərini gördünüz? MB bunu yazmayıb və düz də edib! Çünki dünyada heç bir iqtisadi böhran yoxdur. Söhbət yalnız Çin və Avropa Birliyinə daxil olan ölkələrdə iqtisadi artımın zəifləməsindən gedir. Amma artımın olub-olmaması müzakirə mövzusu deyil. Dünyanın birinci iqtisadiyyatı olan ABŞ isə ümumiyyətlə iqtisadi yüksəlişini yaşayır.
Böhran bizim hökumətin başındadır, yəni beynində, iqtisadi idarəetməsində, məsələlərə yanaşmasında və səmimiyyətindədir. Yalan danışmaqdan və oğurluqdan başqa bildikləri bir iş yoxdur. Bu illər ərazində neftdən başqa dünya bazarına çıxaracağımız bir mala sahib ola bilmədik. Çünki hakimiyyət azad iqtisadiyyatın yerinə, monopoliyalar qurdu; sahibkarlığı təşviq etməyin əvəzinə, iş adamlarına qarşı korrupsion mexanizmlar, bürokratik əngəllər yaratdı; istehsalatı təşviq etmək əvəzinə, istehsalata yatırım edənlərin mülkini əlindən aldı... İndi də AzTV-də yalan yalan deyirlər ki, dünyada iqtisadi böhran var və bizə də təsiri hiss olunur. Halbuki Mərkəzi Bank heç bunu demədi. Böhran, iqtisadiyyatı xam malın satışından asılı olan ölkələrdə var, necə ki, bizim ixracatımızın 95%-ni neft-qaz təşkil edir. MB bugünkü bəyanatında dünya bazarında neftin deşməsini iqtisadiyyatımıza təsir edən əsas amil kimi göstərib və yenə də doğru edib. Bir sözlə bunu yazmaqla iqtisadiyyatımızın tamamilə neftdən asılı olduğunu etiraf edib!
Bu illər ərzində daxili bazarımızı öz istehsalımız olan kənd təsərrüfatı məsulları ilə də təmin edə bilmədik. İstənilən marketə girdiyində, Türkiyədən, İrandan, Pakistandan gətirilən meyvə-tərəvəzi görürük. Gədəbəyin olduğu yerdə Misirdən kartof gətirməyin adı nədir?
Ölkə iqtisadiyyatına islahatlar lazımdır. Lakin siyasi islahatlar olmadan bunu etmək mümkün olmayacaq. Siyasi islahatlara isə vaxt itirmədən ilk növbədə iki məsələdən başlamaq lazımdır:
1. Siyasi məhbuslar azadlığa buraxılmalıdır;
2. Yeni parlament seçkiləri keçirilməlidir.
2. Yeni parlament seçkiləri keçirilməlidir.
Yaxın bir il ərazində bunları etməsələr ölkəni böyük fəlakətlər gözləyir. Bunun qərarını biz yox, hakimiyyət verir. Qərarvermə imkanı hal hazırda hələ ki, bunların əlindədir.
“Buradan elan edirəm, heç nədən də qorxmuram. 34 yaşım var, qoy, qanım bu millətə halal olsun” deyən Rüfət Səfərovun prokurorluqdan istefa bəyanatını yəqin ki, oxumusunuz. Oxumayanlar da şərh bölümündəki linkdən oxuyar. Rüfət Səfərovun istefa bəyanatı əslində prokurorluq müstəntiqinin rejimə qarşı irəli sürdüyü ittihamnamədir. Rüfət Səfərov öz istefa bəyanatında yazır: “Millətimin taleyindən hədsiz narahatam. Bu gün oğrular, korrupsionerlər bayırda kefdə-damaqdadır, zərrə qədər günahı olmayan insanlar isə həbsxanalarda çürüyür. Onların yeganə günahı həqiqəti söyləmələridir... Azərbaycanda hüququn deyil, hüquqsuzluğun üstünlüyü var. Ölkədə azadlıq adına heç nə qalmayıb. Yalnız «ölmək azadlığı» var.”Prokurorluqdan istefa verən müstəntiq demək olar ki, hakimiyyətin mətbəxində böyüyüb. O məşhur YAP-çı, “91-lər”- in üzvü, keçmiş deputat və Müdafiə Nazirliyinin mətbuat xidmətinin rəhbəri olmuş Eldar Sabiroğlunun oğludur. Hakimiyyəti həm də içdən tanıdığından bu bəyanatdan sonra özünə və ailəsinə qarşı repressiya başlayacağını gözləyir. YAP fəalı olan atasının mənəvi terrora məruz qala biləcəyindən ehtiyatlansa da, bu bəyanatı verən zaman hətta atasının onu övladlıqdan çıxaracağını da göz önünə aldığını, ailəsinin və özünün rifahını deyil, əzilən millətinin mənafeyini seçdiyini bəyan edir.
Buyurun, hakimiyyətdə təmsil olunanların da xeylisinin rejimdən narazı olmasına, hökumət daxilində mərkəzdənqaçma meyllərinin güclənməsinə daha bir sübut. Gənc müstəntiqi bu cəsarətli hərəkəti münasibətilə təbrik edirəm. Onun qərarı düzgün qərardır. Heç bir dövlət qulluqçusu, hüquq mühafizə orqanı əməkdaşı “axı tək mən nə edə bilərəm? Mən bu nəhəng aparatın xırda vintiyəm, mən olmasam da bu repressiya maşını işləyəcək” deyib, özünə haqq qazandırmasın. Ən böyük və güclü maşın və mexanizmlər də çoxsaylı xırda detal və vintlərdən ibarətdir. Repressiya maşınının hər bir “vintinin” açılması həmin maşını zəiflədir.
Rüfət Səfərovun atası YAP-çı Eldar Sabiroğluna isə demək istəyirəm ki, oğlunuzun bu bəyanatına görə narahat olmaq, onu tənbeh etmək yox, onunla qürur duymaq lazımdır. Bəli, bu bəyanatın sizə hansı məhrumiyyətlər gətirməsindən asılı olmayaraq belə bir cəsarətli bəyanatı verə bilmiş oğlunuzla fəxr edin. Bəlkə də, bu sizin həyatdakı ən böyük nailiyyətiniz və xalq qarşısındakı ən böyük xidmətinizdir ki, belə cəsarətli, mübariz, xalqını sevən oğul böyütmüsünüz.
