Baş verənlərin təfərrüatına varmayacam, sadəcə onu deyim ki, biz ilk yardıma gələnlər sırasındaydıq. Əfsus ki, 30 insan artıq dalğaları 11 metr hündürlüyə qalxan dənizə düşmüşdü. Onlardan 4-ü xilas oldu - dənizdə batmaq təhlükəsini gözə alan cəsarətli insanların 11 metrlik dalğaya xilasedici qayıq endirməsi sayəsində. Onların necə risk etdiklərini təsəvvürünüzə belə gətirə bilməzsiniz. Gəmilərdə illüminatorlar yanıb-sönür və göyərtəni su basırdı, qasırğa projektorları qoparır, əsas mühərriklər işləmirdi, onlarsa heç olmasa kimisə xilas edə bilmək üçün suya plastik xilasedici qayıq saldılar. Xəbərlərdə onlar barədə heç kim heç nə söyləyən deyil. Əhsən, uşaqlar, sizinlə ilk görüşdəcə əllərinizi sıxacam. Xilas edilənlərdən biri, təəssüf ki, dünyasını dəyişdi... 26 nəfər həmişəlik suya qərq oldu. Hətta hidrokostyumda belə bu cür suya 4 saatdan artıq davam gətirmək mümkün deyil.29 adam patformanın ayaqlarında ilişib qalan ikinci qayıqda, demək olar ki, 12 saat keçirdi. Onların bəxti daha çox gətirdi. Hamısını xilas etmək mümkün oldu. Qayığa minməyə macal tapmayan 3 adam yanan platformada qaldı. Onların səsi hələ də qulaqlarımdadı: "Yalvarırıq, bura su çiləyin, istidən öləcəyik"... Gəmilər platformaya su çiləyə bilmək üçün növbə ilə ağzın dalğaları yarmağa çalışdı. Bu səhnə yaddaşımdan ömürlük silinən deyil.
Siz o xəbərlərdəki görüntülərə aldanmayın: bir neçə gəmi əla hava şəraitində platformadakı yanğını söndürür. Hadisə heç də belə cərəyan etməyib, hər şey qat-qat pis idi.
Mən hələ digər platformada suya düşənlər barədə danışmıram.
Və ən İYRƏNCİ - xəbəri nə cür çatdırmağı dəqiqləşdirmək üçün "böyük dayıların" ardı-arası kəsilməyən zəngləri idi. Sən bütün gücünü toplayıb qaranlığa zillənir və fənərlə kimisə göməyə, kimisə xilas etməyə çalışırsan. Onlarsa səni hər dəqiqə başı zəng edərək dəng edirlər ki, yaşananlar barədə nəyi danışmaq olar, nəyi yox. Bilirsiniz nə var? Əbləhlər, görüm sizi gəbərəsiniz! Bu, Denisin söylədiklıridi. Mən də eyni sözü təkrarlayıram: Görüm sizi gəbərəsiniz, əbləhlər!!!
90-cı illərin sonuna qədər Azərbaycanda güclü neftçi həmrəyliyi vardı. Neftçilərin həmkarlar təşkilatı sözünü deyə bilirdi. Elə həmin "28 may" NQÇİ-də 96-cı ildə neftçilər güclü tətil keçirib əmək haqlarının artırılmasını, əmək şəraitinin yaxşılaşdırılmasını tələb eləmişdilər. Vertolyotu, MTN-i zadı platformaya enməyə qoymamışdılar. Deyirdilər quyuları bağlayacağıq, 72 saat hökumətə vaxt veririk. Jiloy adasında neftçilərin ARDNŞ şefi Natiq Əliyevi necə divara dirəməyi yaxşı yadımdadır. Natiq pencəyini aralayıb tapançasını göstərəndə naxçıvanlı fəhlə Emil vardı, dedi bizi bununla qorxudursan? Bir fəhlə isə cibindən qəpik-quruş çıxarıb Natiqin qabağında masaya çırpmışdı, demişdi: "Sən toyuq qızartması yeyirsən, mənimsə uşaqlarım acdır". (Yazığın nəzərində toyuq qızartması delikates idi).
Sonra neftçilərin həmkarlar komitəsini yavaş-yavaş dağıtdılar. Bu işdə alçaq bp şirkəti də hökumətə yardım elədi. Böyük pullar gələndən sonra balaca adamların ölməyi heç kimin gözünə görünmürdü.
İlk baxışda elə görünə bilər ki, baş verənlər fonunda xırda məsələdi, amma inanın ki, belə deyil. Çünki altşüurumuzdakı zəif nöqtələrdən xəbər verir. Deməli, xeyli adam faciə ilə bağlı Ramiz Rövşənin "Vətən" adlı şeirini paylaşır. Deməli, o şeirdə belə misralar var ki, "Bilirsən səni sevmək bu saat nəyə bənzər, Zorlanmış bir qızı sevməyə bənzər". Bu insan naqisliyinin son həddidir. Əvvəla zorlanmış qızı niyə sevmək olmaz? Axı o fahişə deyil, o zorakılığın qurbanıdır. Sevgiyə də layiqdir, hörmətə də. Hətta daha çox layiqdir. Çünki zorlanma varsa, deməli ortada qarşı tərəfin müqaviməti var, dirənişi var. Könüllü şərin qucağına yatmaqdan qat-qat qiymətlidir bu. İkincisi, "Adam səni sevməyə indi utanır, Vətən.... Neftlə getdi bəkarətin, borular keçdi səndən" - belə iyrənc bir yanaşma ola bilərmi? İnsan kimlərinsə pis idarəçiliyinə, tamahkarlığına, cibgirliyinə görə niyə vətəni sevməkdən utanmalıdır? Oliqarxlar sahilini hasarlayır, amma mən durub Xəzəri ittiham edirəm. Belə bir şey ola bilərmi? Xəzər neyləməlidir, balıqlarını, yosunlarını götürüb mitinqə çıxmalıdır?Vətənə bu cür anormal xitabdansa, cəsarət göstərib onu bu kökə salanlara hiddətlənmək lazımdır. Onlara üsyan püskürmək, hər kəsi belə bir etiraz ruhuna kökləmək lazımdır. Bunu bacarmırıqsa barı haqsız yerə vətənə yüklənməyək, onu günahkar, müqəssir çıxarmayaq.
Vətən neyləməlidir, onun dağı, daşı, gölü, çayı, dənizi, meşəsi gəlib adamlarının yerinə şərlə döyüşməlidir? Axı vətəni vətən edən onun insanlarının haqq, ədalət uğrunda mücadilə əzmidir. Onun insanlarının etiraz ruhudur. Şərə qarşı dirənişidir. Yoxsa bir ölkədə hakim sifarişli qərar çıxarmaqdan, çinovnik büdcəni talamaqdan, həkim xəstənin ağrıyan yerindən əvvəl onun cibinə baxmaqdan, müəllim seçki qutusuna topa-topa bülleten atmaqdan, şair orden-medal üçün şah qapısında yatmaqdan utanmasın, sən də götür yaz ki. Şahdağ, Göygöl, xan Araz, nə bilim, İsmayıllı meşələri, mən sizi sevməkdən utanıram, niyə bu qədər haqsızlıq baş verir?!
Bilmirəm fikrimi izah edə bildimmi? Anlada bilmədimsə üzrlü sayın. Bir də üzrlü sayın ki, bu qədər uzun yazdım.
“Dostlar! “Günəşli” yatağında baş verən yanğın böyük faciədir. 34 nəfər həyatını itirib, çox sayda insan yaralanıb, itkin düşənlər var. Böyük itkidir. 34 ailə başsız qaldı. Niyə bu faciələr bizim başımıza gəlir? Bu ilin may ayının 19-da alışqan üzlüklərlə üzlənmiş 16 mərtəbəli binada içində körpə uşaqlar da olmaqla 16 nəfər insan həyatını itirdi. Bu faciənin əsl günahkarlarına, alışqan üzlüklərdən qazanc götürən üzlü məmurlara, buna icazə vermiş müvafiq nazirlik və idarələrə gözün üstə qaşın var deyən olmadı. 16 nəfər vətəndaşımız yüksək vəzifə sahiblərinin həddi-hüdudu olmayan tamahının, səhlənkarlığının, laqeydliyinin, biganəliyinin, əsl həqiqətdə isə cinayətinin qurbanı oldu. Dedilər ki, guya prezident yanan binanı nəzarətə götürüb. O, nəzarətin axırı necə oldu? Əsl günahkar tapıldımı, cəzasını aldımı? Bir-iki yetim-yesiri, mənzil istismar sahəsi əməkdaşını məsuliyyətə cəlb etməklə 16 şəxsin həyatına son qoymuş cinayət hadisəsi ört-basdır edildi. İl ərzində içində Qarabağ əlilləri olmaqla təxminən bir o qədər adam da haqsızlığa, çarəsizliyə, ədalətsizliyə, məmur harınlığına, kredit əsarətinə etiraz edərək özünü yandırdı. Bu günə kimi hansı vəzifəli şəxs vətəndaşı özünü öldürmə həddinə çatdırma ittihamı ilə sorğuya çəkilib? Bu intiharlar ölkəsində həmin ittiham üzrə təkcə Xədicə İsmayılı həbsə alınıb. Yüksək vəzifə sahiblərinin zülmünə etiraz əlaməti olaraq özünə od vurmuş Qarabağ qazısının bədənindən qalxan alov ərş-əlaya, tüstüsü göyün yeddinci qatına qalxır. Bu intihar hesab edilmir. Amma kimsə siçan dərmanı ilə siçan-pişik oynayır buna görə özünü intihar həddinə çatdırma maddəsi ilə Xədicəni tuturlar. Daxili İşlər Nazirliyinin qeyri-peşəkarlığı, məsuliyyətsizliyi, hoqqabazlığı nəticəsində Nardaranda 7 nəfər insan həyatını itirib, yalnız 10 gündən sonra həlak olan insanların cəsədləri ailələrinə verilir. Bütün baş verən qanunsuzluqlar və o cümlədən meyitlərin sahiblərinə uzun müddət verilməməsi DİN-in insan ölümü ilə nəticələnən müəmmalı “əməliyyatını” ört basdır etmək cəhdidir. “Günəşli” yatağının 10 saylı platformasında baş vermiş yanğın nəticəsində 34 nəfər həyatını itirib. Bu faciə barədə Azərbaycan Respublikası Dövlət Neft Şirkəti, Fövqəladə Hallar Nazirliyi və Respublika Baş Prokurorluğunun birgə məlumatından bir şey anlamaq olmur. Ölənlərin sayı barədə məlumatlar xarici agentliklər tərəfindən dəqiqləşdirilib. Bu işə məsul olan idarələr isə faciə barədə ölkə ictimaiyyətinə başa düşülən bir məlumat vermir. Bu ölkədə hamı odla oynayır: kimisi məsuliyyətsizliyindən, kimisi harınlığından, kimisi də çarəsizliyindən. 19 may faciəsi bu adamlara dərs olmadı. Heç bir peşə hazırlığı olmayan şəxslər bacarmadığı sahələrə rəhbərlik edəndə belə də olacaq. İnşaat mühəndisi Azneftə, həvəskar bəstəkar FHN-ə, vaxtilə cinayət işini saxtalaşdırdığına görə prokurorluq orqanlarından xaric edilmiş birisi də Baş prokurorluğa rəhbərlik edir. 34 nəfərin həyatına son qoymuş bir faciə haqqında onların verdiyi açıqlama bundan artıq olmayacaq ki. Azneftin tarixində ilk dəfədir ki, neft sənayesinə aidiyyəti olmayan adam Dövlət Neft Şirkətinə başçılıq edir. Hanı milyonlarla vəsait xərclədiyiniz təhlükəsizlik texnikası, əmək mühafizəsi, təbii fəlakət zamanı neftçilərin odda yanmamaları, suda batmamaları üçün istifadə etməli olduqları qoruyucu geyimlər, fövqəladə böhran şəraitində insanları xilas etmək üçün aldığınız avadanlıq? Bu qardaşlarımıza Allahdan rəhmət diləyirik, ailələrinə başsağlığı veririk, onlar tək təbii fəlakətin deyil, həm də məmur səhlənkarlığının, bacarıqsızlığının, laqeyidliyinin qurbanı oldular”.
